'విదేశీ విద్యార్థులను వెనక్కి పంపితే.. అమెరికాకే నష్టం'

విదేశీ విద్యార్థులను వెనక్కి పంపించే విధంగా ట్రంప్​ ప్రభుత్వం తీసుకున్న నిర్ణయంపై సర్వత్రా వ్యతిరేకత వ్యక్తమవుతోంది. ఇది దేశానికి భారీ నష్టం కలిగిస్తుందని పలువురు చట్టసభ్యులు ఆరోపించారు. విద్యార్థుల్లో అనిశ్చితి నెలకొందని విశ్వవిద్యాలయాలు ఆందోళన వ్యక్తం చేశాయి. అయితే ఈ కొత్త నిబంధనలు తాత్కాలికమేనని.. విదేశీ విద్యార్థలకు ఇప్పటికీ అవకాశముందని ప్రభుత్వం తెలిపింది.

ఆన్​లైన్​లో శిక్షణ పొందుతున్న విదేశీ విద్యార్థులు అమెరికాను విడిచి వెళ్లాలన్న అమెరికా అధ్యక్షుడు డొనాల్డ్​ ట్రంప్​ ప్రభుత్వంపై ప్రముఖ విద్యా సంస్థలు సహా చట్టసభ్యులు తీవ్ర స్థాయిలో మండిపడుతున్నారు. ఈ నిర్ణయం వల్ల ఆర్థిక వ్యవస్థ దెబ్బతింటుందని, అమెరికా వ్యవస్థలకు హాని కలిగిస్తుందని, దేశ భద్రతలో మార్పులు తీసుకురాదని కాంగ్రెస్​ సభ్యులు థామ్​సన్​, కాథ్లీన్​ రైస్​ సంయుక్త ప్రకటనను విడుదల చేశారు.

"విదేశీ విద్యార్థులపై పట్ల ట్రంప్​ యంత్రాంగ వైఖరికి చట్టబద్ధమైన కారణాలు లేవు. విద్యార్థులు దేశాన్ని విడిచి వెళ్లిపోవాలని వారు కోరుకుంటున్నారు. అమెరికా ఆర్థిక వ్యవస్థకు విదేశీ విద్యార్థులు బిలియన్​ డాలర్లు అందిస్తున్నారు. వారిని దేశం నుంచి పంపిస్తే..అమెరికాకే నష్టం. వలసదారులపై తనకున్న వ్యతిరేకతను సంతృప్తి పరచుకోవడానికి ట్రంప్​ తీసుకుంటున్న నిర్ణయాలను ఇక సహించలేము. దీని వల్ల అనేక మంది ఉద్యోగాలు కోల్పోతున్నారు. విశ్వవిద్యాలయాలకు హాని జరుగుతోంది. ఈ నిర్లక్ష్యపూరిత విధానాలను మేము వ్యతిరేకిస్తున్నాం."

-- కాంగ్రెస్​ చట్టసభ్యుల సంయుక్త ప్రకటన.

ఆన్​లైన్​ ద్వారా శిక్షణ పొందుతున్న విదేశీ విద్యార్థులను.. వెనక్కి పంపించే విధంగా మంగళవారం నూతన నిబంధనలను జారీ చేసింది అగ్రరాజ్య ఇమ్మిగ్రేషన్​ అండ్​ కస్టమ్స్​ ఎన్​ఫోర్స్​మెంట్​. అమెరికాలో విశ్వవిద్యాలయాల పునఃప్రారంభంపై ఒత్తిడి పెంచింది.

ఈ కొత్త విధానం వల్ల విదేశీ విద్యార్థుల్లో అనిశ్చితి నెలకొంటుందని ఆవేదన వ్యక్తం చేశారు స్టాన్​ఫోర్డ్​ అధ్యక్షుడు మార్క్​ టెస్సర్​ లావిగ్నె.

"డిగ్రీలను పూర్తి చేసుకునే విధంగా విదేశీ విద్యార్థులకు అవకాశం కల్పించాలి. ఇందుకు విశ్వవిద్యాలయాలు సహకరించాలి. ఈ కొత్త నిబంధనల పరిణామాలు ఎలా ఉంటాయో విశ్లేషించడానికి జాతీయ సంఘాలతో కలిసి పనిచేస్తాం. కానీ ఈ నిబంధనలపై పునరాలోచన చేయాలని ప్రభుత్వ యంత్రాంగాన్ని కోరుతాం. దీని వల్ల అనేకమంది విద్యార్థుల్లో అనిశ్చితి నెలకొంది."

-- మార్క్​ టెస్సర్​, స్టాన్​ఫోర్డ్​ విశ్వవిద్యాలయ అధ్యక్షుడు.

ఈ పూర్తి వ్యవహారంపై ఇమ్మిగ్రేషన్​ విభాగం స్పందించింది. ఈ నిబంధనలు తాత్కాలికమేనని స్పష్టం చేసింది. సెప్టెంబర్​- డిసెంబర్​లో వివిధ కోర్సులను అభ్యసించాలనుకుంటున్న వారికి ఇంకా అవకాశముందని పేర్కొంది.

"ఈ తాత్కాలిక నిబంధనలతో వలసయేతర విద్యార్థులకు.. అమెరికాలోనే చదువుకునే సౌలభ్యం కలిగిస్తుంది. అమెరికావ్యాప్తంగా కాంపస్​లలో భౌతిక దూరాన్ని పాటించడానికి దోహదపడుతుంది. విదేశీ విద్యార్థులు తగిన విసా పొందాల్సి ఉంటుంది. ఈ విషయంపై స్పష్టత కోసం స్థానిక అమెరికా రాయబార కార్యాలయాన్ని విద్యార్థులు సంప్రదించాలి."

-- అమెరికా ఇమ్మిగ్రేషన్​ విభాగం.

ఇదీ చూడండి:- సొంత కుటుంబం నుంచి ట్రంప్​కు పెద్ద షాక్​!